Udaberri dantza taldea

Kargatzen...

Itxi

Ainhoa Goikoetxea

Kaixo! Ni Ainhoa naiz, 1999an jaiotako tolosarra. Dantzaz gain futbolean ere ibiltzen naiz, erizaintza ikasketak burutzen nabil eta animaliak eta natura dira nire zaletasun handienak.

Noiz eta zergatik hasi zinen Udaberrin?

4 urte inguru nituela hasi nintzen, nire amak izena emanda. Lehenengo urteetan erdi behartuta sentitu nintzen, ikasturte berria hasi eta amak gogoz kontra ematen zuelako izena. Hala ere, kurtso amaierarako izugarri gustura joaten nintzen. Azkenean, lagunekin arratsaldeak pasatzeko beste modu bat zen, jolas bat.

Helduen taldera iritsi bitarteko prozesua nola bizi izan zenuen? Horrelakoa izango zela uste al zenuen?

Oso gogorra izan zen, ez baitziren gutxi izan etxera negarrez iritsitako egunak. Urte batetik bestera, ikastaroetako irakaslearekin jolasak egitetik, Vallejoren garrasiak entzutera igaro ginen. Urte batean, gainera, nire taldearekin entseatzeaz gain, helduen taldearekin ere entseatzen aritu nintzen; denbora bikoitza eskatzen zuen, eta benetan nekagarria izan zen.

Nola ikusten zenuen taldea lehen, kanpotik, eta nola orain, barrutik?

2016an sartu nintzen taldera, eta bertan aurkitutakoak asko harritu ninduen. Irudikatu nezakeena baino lan handiagoa dago egiteko, baita ardurak hartzeko ere. Hala ere, edozein momentu aprobetxatzen dugu afariak antolatu eta parrandara joateko, egunerokotasunean lan karga sentsazioa gutxitzen delarik.

Zein dantza duzu gustukoen? Eta zein plaza?

Gustukoena arin-arina dela esango nuke, edo fandangoa bestela. Sueltoko doinuren bat entzuten dudan bakoitzean sentitzen dut egiten ari naizena utzi eta dantzan hasteko beharra. Sarri gertatu izan zait aspertuta egon eta behatzekin dantza imitatzea, edota irudikatzea jajaja.

Urteko emanaldirik bereziena San Joan bezperakoa da niretzat. Andre maria plaza magiaz betetzen da, gau ilunean, herritar mordoa biltzen delarik.

Zein da euskal dantzako doinuetatik gehien gustatzen zaizuna?

Agurrak hunkitu egiten nau, bere estilo guztietan.

Kontaiguzu urteotan gertatu zaizun anekdota bitxietako bat

Udaberritarrok urtero afari bat antolatzen dugu Errege Egunaren bezperan, eta lagun ezkutua prestatzen dugu. Afarira joan nintzen lehen urtean, nire lagun ezkutuak bertso bat idatzi zidan, gaur egun gelan zintzilikaturik dudana. Izugarri hunkitu nintzen hitzekin, eta oraindik ere malkoren bat isurtzen zait hura irakurtzean. Zoritxarrez, oraindik ez dut asmatu nor izan zen altxor gisa gordetzen dudan bertso horren egilea. Beharbada hau irakurriz gero, jakinaraziko dit…

Nola ikusten duzu taldearen etorkizuna?

Azken urteotan taldekide gazte ugari sartu dira, ni hasi nintzenean taldean zeudenak uzten hasi diren une berean. Hala ere, gogotsu ikusten ditut denak, eta badakit taldea nola bideratu irakatsiko digutela gazteoi, Udaberrik beste hainbat urtez plazak alaitzen jarrai dezan.